2018-yil 2-dekabr kuni Toshkent shahrida joylashgan V.I.Romanovskiy nomidagi Matematika institutida Toshkent shahridagi oliy o‘quv yurtlari talabalari,  litsey o‘quvchilari o‘rtasida matematika fanidan o‘tkazilgan olimpiada yakunlari sarhisob qilindi.

Olimpiada “Akademik Qori-Niyozov merosi” ilmiy metodik  markazi homiyligida o‘tkazildi.

Birinchi o‘rinni  85 ball bilan Ozodov Rasulbek, ikkinchi o‘rinni  82 ball bilan  Ahadov Abdushukur, uchinchi o‘rin 80 ball bilan Yusupov Suxrobga nasib etdi. Barcha g’oliblar uchinchi kurs talabalari.

Matematika instituti direktori akademik Ayupov Shavkat Ayupovich g‘oliblarga sertifikat va sovg‘alarni topshirdi.

Matematika barcha fanlarning asosidir. O‘zbekistonning iqtidorli yoshlari mamlakatimizda matematika fanini rivojlantirish uchun barcha imkoniyatlarga ega.

“Akademik Qori-Niyozov merosi” markazi faoliyati yosh olim va mutaxassislar, talaba va litsey o‘quvchilarining matematika yo‘nalishidagi ijodiy faoliyatini qo‘llab-quvvatlashga qaratilgan. Markaz matematik olimlarga matematik tadqiqotlar olib borish, oliy ta’lim, litsey va kollejlarda matematika fanini o‘qitish metodikasini takomillashtirish uchun ko‘mak beradi. Markaz tomonidan stipendiyalar beriladi, yosh matematiklar uchun tanlovlar va olimpiadalar tashkil etiladi.