1. Indira Satniyazova Qaniyaz qizi. O‘zbekiston Respublikasi Qoraqalpog‘iston Respublikasi, Kegeyli tumanida tug‘ilganman va shu tumandagi 38-sonli umumta’lim maktabini tugatganman.
2. Hozirda Qoraqalpoq Davlat Universitetining Matematika fakultetida “Matematika ta’limi” yo‘nalishi 3-bosqich talabasiman. Bu universitetni tanlaganimning asosiy sababi deb imkon qadar matematikani eng zo‘r joyda o‘rganishga bo‘lgan istagimni keltirishim mumkin. Afsuski, Toshkentda o‘qishga imkonim bo‘lmadi. O‘z shahrimdagi eng zo‘r universitet esa QDU deb bilardim. Chunki shu yerda matematika yo‘nalishida tahsil olayotgan opamdan universitetning o‘qituvchilari, ayniqsa, matematik muhit haqida juda yaxshi fikrlar eshitganman. Kelajakda matematika bo‘yicha fundamental tadqiqotlar olib borib, matematikadan yangiliklar qiladigan olim bo‘lmoqchiman. Bakalavr diplomini olganimdan keyin, albatta matematikaning yo‘nalishlaridan birini tanlab, magistraturaga topshiraman. Xudo xohlasa, uni tamomlagach PhD ilmiy darajasini olish uchun tadqiqotlar olib boraman.
3. Matematika – mening borlig‘imdir. Men bu fan bilan 1-sinfligimdan beri shug‘ullanaman. Oyim matematika o‘qituvchisi bo‘lgani uchun kichkinaligimdan uyimizda matematik muhit hukm surgan deyish mumkin. Opam va oyim bilan birgalikda o‘tirib, misollar yechardik va o‘quvchilarning yozma ishlarni tekshirardik. Keyinchalik katta sinfligimda matematika bo‘yicha olimpiadalarda qatnashib, g‘olib bo‘ldim. Matematika fani ustozim yordami bilan bu fanga qobiliyatim borligini kashf etdim va jiddiy shug‘ullanishni boshladim. Men uchun asosiy to‘siq bu til bilmaslik edi. Rus tilida masalalarni yechishim uchun rahmatli bobom sabr bilan tarjima qilib berardilar. Ammo keyinchalik 9-11-sinflar olimpiadasiga o‘tganimda tushundimki, ingliz tilidagi kitoblar tarjimasiga hech kim yordam berolmaydi. Men bu tilni bilmasam, kombinatorika, sonlar nazariyasi kabi Xalqaro Matematika Olimpiadasiga kerak bo‘limlarini o‘rgana olmayman. Shundan so‘ng 10-sinfda asosiy vaqtimni ingliz tilini o‘rganishga sarfladim. Ingliz tilini bilganim keyinchalik Universitet olimpiadalarida katta yordam berdi. Matematika- mening o‘tmishim, bugunim va albatta, kelajagimdir.
4. Bu markaz mening tushunishim bo‘yicha akademik Qori Niyoziy hurmatiga tashkil etilgan bo‘lib, har xil yosh olimlarni qo‘llab-quvvatlash va turli tanlovlarni tashkillashtirish orqali matematika ilmini rivojlantirishga, targ‘ib qilishga katta xizmat qilib kelmoqda.
5. Olimpiada juda yaxshi tashkillashtirilgan. Ayniqsa savollarning tuzilishi ajoyib. Ularni har yili katta ishtiyoq bilan ishlayman. Bu olimpiadaga aslida O‘zbekistonda muntazam tashkillashtirilayotgan jiddiy olimpiada deb qarashimiz va kuchli hurmatimiz sabab, unda qatnashishga ulgurish uchun 26-30-noyabr kunlarida Moskva shahrida tashkillashtirilgan RUDN – 2025 olimpiadasining taqdirlash marosimiga qatnashmasdan ertaroq kelishga harakat qildik. Shoshilib kelishga arziydigan masalalarni ko‘rganimda deyarli dam olmasdan kelganimga quvondim. Chunki, olimpiadalarda bunaqa ajoyib misollarni ko‘rsam, ularni zavqlanib ishlayman va yangi narsalarni o‘rganaman. Olimpiadaning saralash bosqichi savollari ham oliy matematikadan qiziqarli testlarni o‘z ichiga olgan edi. Olimpiada sayti ham deyarli mukammal ishladi.
Olimpiadalar, shu jumladan Akademik Qori Niyoziy nomidagi olimpiada talabalarni nafaqat matematikaga qiziqtiradi, balki ularni yanada o‘rganishga chorlab, iqtidorli talabalarni doimiy me’yorda ushlab turadi, kibrdan saqlaydi. Masalan, men g‘olib deb topilgan bo‘lsam-da, hali ham o‘rganishim kerak narsalar anchagina ekanligini tushundim. Bu esa juda foydali. Chunki, biz insonlar adashamiz va o‘zimizni atrofimizdagilardan kuchliroq deb o‘ylasak, o‘rganishdan to‘xtaymiz. Olimpiada esa shunday holning oldini oladi. O‘zimning misolimda aytsam, bu olimpiadaga 2023-yildan buyon ikki marta: dastlabki yil onlayn, keyin oflayn qatnashdim. Bu olimpiadadan har gal «men bularni bilmas ekanman, raqiblarim ancha kuchli ekan, demak, men o‘rganishim kerak» degan o‘ylar bilan qaytganman. Bu esa ajoyib tuyg‘u! O‘qishga doir kimdandir motivatsiya olish ko‘pi bilan uch-to‘rt kunga yetadi, lekin shu kabi olimpiadalarda o‘z kamchiliklarini ko‘rgan ichki menimiz olgan xulosalar uzoq muddat bizni olg‘a intilishga undaydi. Kelasi yili imkonim bo‘lsa yana shu olimpiadaga qatnashaman. Mukofot yoki g‘oliblik uchun emas, balki 4 yarim soat maroq bilan misol ishlash uchun qatnashaman!

1. Men Qobiljon Lapasov, Sirdaryo viloyati, Sayxunobod tumanida tug‘ilganman va shu yerdagi 6-maktabni tamomlaganman.

2. Ayni vaqtda Toshkent shahridagi Turin Politexnika Universitetida o‘qiyman.
Bu universitetni tanlashimning asosiy sababi ixtirochilikka, yaratuvchanlikka qiziqishlarim deb bilaman.
Kelajakdagi maqsadlarim elektronika va mexanika sohasida yetuk mutaxassis bo‘lish va bu yo‘nalishda ilmiy ishlar olib borish. Albatta o‘qishni bitirgandan so‘ng qayerda ishlashimni orzu qilganman. Bu Niderlandiyaning ASML kompaniyasi.

3. Matematikani hech qanday sabablarsiz yaxshi ko‘raman. Olimpiadalar menga ko‘p narsalarni o‘rgatgan. Biror fan yoki sohani muammo deb qarasak, Matematika bu yechim. Kelajak kasbim Bul algebralariga doir va muhandislik sohasini matematikasiz tasavvur qilib bo‘lmaydi.

4. Ushbu markazni ko‘proq Olimpiadalar sabab tanib olganman.

5. Olimpiada savollari qiziqarli bo‘ldi. O‘z o‘rnida qiyinlari ham, osonlari ham bor edi. Olimpiada lokatsiyasi Universitetimga yaqin bo‘lgani uchun topishda qiyinchiliklar bo‘lmadi. Olimpiada savollariga imtihon yakunida shaxsan mualliflar tushuntirishlar berishdi. Talabalar o‘rtasidagi olimpiadalar sanoqli topiladi. Bu olimpiadalar biz uchun qaysidir manoda g‘alaba, qaysidir manoda tayyorgarlik bo‘ladi.